चित्र तुझ...!!!

डोळे तुझे स्वच्छ

जणू निरभ्र आकाश

तुझ्या नजरेचा तो कटाक्ष

जणू सूर्याचा प्रकाश

हसणं तुझ निर्मळ

जणू खळखळणारा झराच

तुझ्या केसांची ती हालचाल 

जणू चित्रकार खराच

सुंदर तुझी मांडणी

जणू स्वर्ग अवतरला 

ध्यास असे हा तुझा

जणू मनी वसलेला

- वरद

बावरे मन....!

तू नसताना तुझ्या असण्याचे

आभास शोधत बसते....

तू नसताना तुझ्या हसण्याचे

सुमधुर गीत आठवते....

तू नसताना तुझ्या नयनांचे

भाव मनी सजवते....

तू नसताना तुझ्या नसण्याचे

कारण शोधत असते....

- वरद

शोधात तुझ्या...!

तप्त त्या उन्हात मी

सावलीच्या शोधत तुझ्या

तहानेने व्याकुळ मी

झऱ्याच्या शोधात तुझ्या

घामाने चिंब मी

झुळुकेच्या शोधात तुझ्या

मनाने तुझाच मी

सोबतीच्या शोधात तुझ्या

- वरद

मिसळ लस्सी चहा आणि क्रिमरोल

खायला होतं खूप काही
पण सोबत मात्र तू नव्हती
म्हणूनच की काय आज
मिसळ खूपच तिखट होती

पाहिली होती गोड स्वप्न
ती फुलण्या आधी नासली होती
म्हणूनच की काय आज
लस्सी मात्र आंबट होती

बुडालो होतो प्रेमात तुझ्या इतका
म्हणूनच की काय आज
चहात बुडवलेल्या क्रिमरोलला
तुझ्या सारखी चवच नव्हती

गेले कित्येक दिवस मी हे खाल्ल
पण आज मला समजलं होतं
मिसळ लस्सी चहा आणि क्रिमरोल
तुझ्याविना  मात्र अळणीच होतं
                       
- वरद

ती ..!!

जाता जाता ती
गोड हसून गेली
दगडाच्या ह्या हृदयाची
तार छेडून गेली

जाता जाता ती
गोड हसून गेली
अंधारलेल्या रात्रितही
तारे चमकाऊन गेली

जाता जाता ती
गोड हसून गेली
काही क्षणांसाठी
वेडं करून गेली

- वरद

एक थेंब अश्रूंचा

एक थेंब अश्रूंचा
खूप काही सांगून गेला
जणू दू:खातल्या भावनांचा
पाढाच वाचून गेला

गालावरती जाता जाता
ओघळ सोडून गेला
जणू आठवणींच्या वाळवंटात
ठसेच उमटवून गेला

तो एकच थेंब असा
मनाची दुर्दशा सांगून गेला
जाता जाता तो
मन कठोर बनवून गेला
मन कठोर बनवून गेला

                 -  वरद

नजर...!!!

नजरेत तुझ्या त्या भावनांचे
गीत हे असे ओसंडले
अबोल माझ्या ह्या शब्दांचे
सूर नयनी जसे जडले

सुंदर एका कटाक्षाने
हृदय चिंब झाले
चक्षुंच्या ह्या संवादाने
शब्दांचे हे गीत बनले

नाते असे हे नयनांचे
अव्यक्त अशा त्या शब्दांचे
नजरेच्या त्या लेखणीने
भाव विश्व चितारण्याचे

              - वरद