माझी माऊ...!!!

आज दोन वर्ष झाली 

त्या माऊच्या जन्माला 

हो ते नामकरण पण 

मीच केलंय ' माऊ '

विचार केला होता 

ती लहान असताना  

तुम्हाला द्यायची  

म्हणून जन्मली तेव्हाच

ठेऊन घेतल मी 

तिला माझ्याजवळ 

तीच नाव पण ठेवलं 

अगदी हळू आवाजात 'माऊ'

म्हटलं तरी जवळ यायची

रोज माझ्या वाट्याचं दूध 

तिला घालायचो 

आता मोठी झाली ती 

पण गोष्टी पूर्वी सारख्या

 राहिल्या नाहीत 

माऊ माझ्याजवळच राहिली 

तुम्हाला द्यायची राहून गेली

रोज येते ती जवळ 

आठवण काढून द्यायला 

छातीशी घट्ट कवटाळून तिला 

होतो निद्रेच्या आधीन 

माऊ माझ्याजवळच आहे 

माझ्या आठवणीं बरोबर 

 

                           - वरद 

 

 

दुःखातली ताकद...!!!

अन्ना सवे दुःख काय ?
ते गिळून टाकता येत
रडून रडून अश्रूंसवे ते
दुसऱ्यापुढे मांडता येत

सांत्वनासाठी कोणी येत तर
कोणी कुरवाळून धीर देत
इवल्याशा काडीच्या आधारावर
जगण्याची उमेद मिळवून देत

हेच ते दुःख ,
एकवेळ नकोस झालेलं जीवन
कधी कधी पुन्हा उभारी देत
नवीन उमेदीनं झेप घेण्यासाठी

आणि महत्वाचं म्हणजे
माणसं ओळखायला शिकवतं
टिकलोच ह्या जीवनात तर
पंखांमध्ये बळ येत
आणि नाही टिकलो तर .....
स्वतःच अनंताचे दार उघडून देत

                        -  वरद